Eigenberedskapsveka 2025

I Vik er informasjonsplakater hengd opp på biblioteket, på kommunehuset og ute i grendane. Informasjonsbrosjyre finn du på kommunehuset eller på biblioteket – og du kan også lasta han ned her digitalt: 

Brosjyre beredskap

Du finn også mykje anna nyttig informasjon på DSB sine sider – DSB.no

Beredskapsvenn

• Vi oppmodar alle til å bli ein beredskapsven. Finn ut kven du kan hjelpe – og kven du kan få hjelp av.
• Med ulike eigenskapar og kunnskapar kan familie, vener og naboar hjelpe kvarandre.
• Samarbeid og fellesskap er viktig i kriser. Snakk med dei rundt deg om kva som kan skje, og korleis de kan klare dykk saman. 

Beredskapsvener kan hjelpe kvarandre med:

• omsorg og støtte
• opphald og overnatting
• deling av utstyr og varer
• praktiske oppgåver

Generelle bodskap 

• Norske styresmakter tilrår at flest mogleg er førebudde på å klare seg sjølve i ei veke. Det er fordi kommunar og naudetatar må prioritere dei som ikkje klarer seg utan hjelp i ei krise.
• Sjølv om Noreg er eit trygt og stabilt land med god beredskap, er det nødvendig at også kvar enkelt innbyggjar er i stand til å ta vare på seg sjølv og dei rundt seg ved kriser.
• Dersom vi blir råka av større kriser som rører mange menneske – og gjer at viktige tenester ikkje fungerer som normalt – kan ikkje alle få hjelp med ein gong.
• Eigenberedskap handlar om å vere førebudd dersom store kriser råkar oss. Nokre døme på slike kriser kan vere ekstremvêr, langvarige straumbrot, pandemiar, dataåtak, sabotasje, ulukker og krigshandlingar.
• På dsb.no/egenberedskap finn du mange gode råd om korleis du kan styrkje di eiga beredskap. 

Dei to aller viktigaste tinga du bør ha er: 

• Drikkevatn - vi tilrår om lag 20 liter per person
• Ein plan for å halde varmen dersom straumen går 

Fakta om eigenberedskapsveka

• Ei årleg kampanjeveke med informasjon og aktivitetar om eigenberedskap. Vert gjennomført i 2025 i veke 44.
• Målet er å auke kunnskapen og medvitet i befolkninga slik at fleire gjer konkrete førebuingar for å klare seg sjølve i ei veke.
• Veka er sett i gang av DSB, men kommunar, sivilforsvarsdistrikt og frivillige organisasjonar over heile landet gjennomfører aktivitetar og informasjonstiltak.
• Målet i 2025 er å nå endå fleire unge enn tidlegare (18–30 år). DSB sine befolkningsundersøkingar viser at yngre har noko lågare medvit om eigenberedskap enn eldre.
• Årets tema er felles eigenberedskap – beredskapsvenn